استراحة الى بعد الاختبارات

*****

تحديث

اتمنى مشاركتكم بالاستبيان الجديد

****

تحديث 2

عتيجة ردت

*****

قربت امتحانات الجامعة

الله يوفقكم كلكم

واسمحوا لى

راح اتوقف شوية

استراحة محارب مثل مايقولون

راح اشتاق لكم ولسوالفكم ولزيارتكم الخفيفة على قلبى

اتمنى ما تقاطعون مدونتى

ودعواتكم يالغاليين

كظماوى

وكويتى

ومزيون

عسى طولة العمر لكم يالغاليين

قوة شلونكم شخباركم

مشكورين على المشاركة بالاستبيان الخاص بالاعمار

ماشاء الله عليكم

شباب الله يطول عمركم ويحفظكم ويخليكم لاهلكم

الى جاوبوا 28 مشارك انقسموا بالصورة التالية

اقل من 18
4 (14%)

18- 22
8 (28%)

23 - 28
12 (42%)

29 - 34
1 (3%)

اكبر من 34
3

...

الى اقل من 18 الله يحفظهم بالثانوية

احلى مرحلة

وقت الشطانة واللعب

والهياتة والعبط

لا مسؤولية ولا حنة

يما عطينى فلوس

يبا ابى اروح الشاليه مع الربع

يمه ماابى غدا الحين

يبا اشترى لاب توب

يعنى هيصة وزنبليطة ...

ومسجات واسواق

من 18/22

وااو هذا العمر صعب

بداية الاحتكاك الحقيقى بالحياة

تكتشف الناس شوى شوى

تعرف الدنيا بشكل ثانى

تبدى تحوشك الدقرات من اهلك وربعك ودراستك ..

تشوف الهيلق وعيال الجخ

تشوف ظلم دكاترة الجامعة

تكتشف ان التطبيقى طايح حظهم

تتحمل المسؤولية بشكل اكبر مع اهلك

تبدى تختار ربعك بصورة دقيقة ...

وتقارن نفسك بالى حواليك على طول

هذة المرحلة مع انى كنت متفوق بالجامعة

وربعى كثر شعر راسى

بس الحقيقة

كانت بايخة ماادرى ليش..

ما دققت فيها وايد وايد ابى اطوفها الحين

****

المرحلة المفصلية

23/28

ااااهه من هذا العمر

تبدى المحاتاة

اهلك يعتمدون عليك اكثر

تبى وظيفة

تبى تتزوج

ربعك يتوظفون قبلك

ويتزوجون وانت ماتزوجت للحين

تحس بالفراغ اذا انشغلوا ربعك مع اهلهم

تكتشف ان فى شغلات يسوونها الى كبرك حركات يهال

تهتم بالسياسة

تتحمس حق الانتخابات

تكتشف ان الانتخابات كلك ونصب

تحب النقاشات والجدل

تهتم بشكلك واناقتك

ما تلبس اى شى

تحب الاماكن المزدحمة والاحتفالات واللوية

تتعرف على شخصيات عامة سياسية واقتصادية

تكتشف ان وايد منهم صورتهم بالتلفزيون او الجرايد احسن من الاصل الف مرة

يطيحون من عينك بعدين...

اذا تزوجت تهتم باسرتك وتتمنى تتوفق بزواجك وبعدين

تربى عيالك

وتحاتى البيت والسكن

وايد اشياء بهالمرحلة

عندى انها اهم مرحلة بعمر الشاب والفتاة

****

29/34

مرحلة الطموح الذاتى

بهالعمر تبدى تهتم بنفسك الحقيقية

تتخلى عن الشكليات

تتحسف على الوقت الى ضاع منك تجامل فيه الناس

تتحسف على بعض الاصدقاء الى عرفت حقيقتهم متاخر

تحاول تبحث عن شى مميز فى شخصيتك

تراودك احلام مواصلة الدراسة

احلام التجارة

احلام الانتخابات

جمعية او مجلس او حتى نقابة مربى النحل

المهم ودك تفوز بالانتخابات

تصير دقيق فى ملاحظة تفاصيل جسمك

شعرك ولونه

كرشك

عضلاتك

حركتك ولياقتك

تبدى تدور نادى او تمارس المشى

عاد شوف

اذا انت ولد جخ او بنت جخ

نادى على البحر

او السالمية او فندق

اذا نص ونص

الاليزيوم او البلانتيوم

اذا تمشى حالك

نادى الاحلام السعيدة او دورة ازالة الكرش بالاصلاح وفاملاه

..

بهالعمر

اذا كنت متزوج...

تفكر بمستقبل عيالك

وللحين تنطر البيت

وتكون بادية عليك علامات ارتفاع الضغط

وتسمع بالكليسترول

واذا كنت مو متزوج

تدور عن الحب

تخاف من قصص فشل ربعك فى زواجهم

مالك خلق حنة المرة واليهال

تشعر بوحدة قاتلة اذا كان كل ربعك متزوجين

لانك صعب تكون صداقات جديدة

اما تصير خوش ريال

او تنحرف وتصير هتلى ابوطير

***

اكبر من 34

بداية النهاية

فى الغالب يكون طاف نص عمرنا

لان اعمار المسلمين

من 60 الى 70 سنة

مثل ماجاء فى الحديث الشريف

يعنى 35 سنة طافت

وبقى وراها 35 والعلم عند الله

تكملها او تزيد وهذا مو اكيد

او ماتطولها وهذا متوقع ولا حول ولاقوة الا بالله

اذا عندك عيال تتعلق فيهم

اذا متزوج وانت صغير تزداد حب لزوجتك

وبنفس الوقت

تراودك افكار قوية

عن الزواج بثانية

تسمع عن المسيار

تسمع عن العرفى

تسمع عن الزواج بدول الخليج شلون سهل ورخيص

تكون استسلمت لقدرك

اما انك تصلح للتجارة

واما انك طرق المعاش

تستهويك المضاربة بالبورصة

تكسب مرة

وتخسر عشرين مرة

تكثر وقفاتك بالعزا

لاحول الا بالله

عمامك وخوالك وعيال عمك الكبار

بدوا يفنقشون

واحد ورا الثانى

تحس انك بديت تكبر

تعد الشيبات براسك

تتعلق اكثر بامك وابوك

تخاف تفقدهم

ماطلع لك بيت

الايجار كسر ظهرك

وتصير حاقد رسمى على الحكومة

تفكر تشترى شقة

او بيت بره الكويت

كل ما شفت البنات والمصبنة بالاسواق

سفلت فيهم وقلت شهالاشكال الوسخة

وين اهلهم عنهم

يمكن كنت مثلهم واكثر على ايامك الله اعلم

...

هذا تحليلاتى وافكارى على المراحل العمرية

ماكتبت كل شى

لانى قاعد ارتجل معاكم واكتب فوقه فوقه

يعنى مو مرتب افكارى ومسجلها

فخذوا وخلوا

لا تدققون وايد

وما كتبت كل شى

طوفت اشياءوايد وايد

وماتكلمت عن البنات

لانى ماادرى شيفكرون فيه

ولاحبيت اخوره بالحجى

اخاف اجرح شعور احد

انا صج اتغشمرواحبكم

واضحك معاكم

لكن مو معناة هذا انى اضيق خلوقكم او ازعلكم

..

الى وصل للحين معاى لهذة النقطة

الله يعطيه الف عافية

ويكون صج مهتم يقرا شنو اكتب

ويكون فعلا بينى وبينه رابط فكرى وعقلى عميق

الى تحملنى وتقبل يطلع على افكارى الصغيرونة

والحين

اتمنى جد تكتبون تعليقاتكم على هالبوست

كل واحد ووحدة ومدة ايده

اقصد مدة كى بورده

لووووووووووووووووووووول

تصبحون على خير

كظماوى وكويتى ومزيون..

تخيلوا ...

تخيل الدنيا بدون حريم..

الأسواق هادية

كساد اقتصادى

شوارع فاضية

شركات الاتصالات تخسر

سوق السيارات ينكسر

دواء الضغط ماله داعى

المصبنة ما يتهاوشون

تختفى الالوان من الحياة

ينخفض معدل الحش الى الحضيض

لا توجد الماركات

تفيض الفلوس عند الرياييل

يختفون الجنوس

....

عيدكم مبارك كلكم

لحد يزعل ترى الايميل منقول مو منى

ماعدا اخر خمس جمل

لوووووووووول

اشوفكم على خير انا مسافر سفرة قصيرة جدا

القاكم اخر الاسبوع ان شاء الله

كسر خاطرى الخروف..ذبحناه من رقبته

عيدكم مبارك

عيدكم مبارك

والله يرجع لنا الحجاج بالسلامة

ويتقبل حجتهم

ويكتب لنا حج او عمرة

امين

..

انا مستغرب البوست الى طاف

مافى وحدة فى البلوقيات كلهم تعرف عتيجة

وتقول انها بخير

وحدة من الثنتين

اما الى تعرف عتيجة ساكتة

واما عتيجة تستخدم بلوق جديد ماتبينا نعرفه

وسلامتكم

استبيان ... وعلج ..وانجعموا بالجياكر..وعتيجة هانم

لوووووووووووول
السلام عليكم اول شى
العنوان رايح فيها ادرى
بس ترى منبطة جبدى حيل
من الخمات ( جمع خمة وفى راى ثانى جمع لخمة )
مغنيات ومذيعات وممثلات
ينطبق عليهم المثل
الى يقول
شوف ويه العنز واحلب لبن
لما يتكلمون عن الجمال
ثلات اربعاهم يعتبرون اية فى الجكر
من غير ما اسميهن
اكيد انتوا تعرفونهم
اعتقد الى تستحق ان توصف بالجمال من كل الى بالتلفزيون
وحدة فقط
هى فعلا جميلة
ومملوحة
مع انى ارفض مجالها الى تشتغل فيه
واتمنى لو تطلع منه اليوم قبل باجر
بس هى حلوة صح
ومزيونة اكيد
وتستحق تغتر بجمالها لو فعلت ..
نوال..وبس
بعدين اليوم الصبح
اول ماركبت السيارة
رايح الدوام
اكلت علج اكسترا
بدون سكر
لووووووول
ماادري شلون
جان ابلعه
وييييييييييييع
يالله صباح خير
علج مبلوع على الريج
علشان جذي كتبت لكم عن الجياكر
لوووووووووووول
...اذكركم بالاستبيان الجديد
عن الاعمارمو تقولون ماشفناه
خاصة اخواتنا من فئة الصواريخ
لووووووووووول
يعرفون روحهم زين
..
واخيرا
لما تكلمت عن الجياكر
تذكرت المدونة العزيزة
عتيجة هانم
كانت تدافع عن الجياكر وتحميهم
وماترضى عليهم
لوووووووووووووووووووووول
انا فاقدها الصراحة
كنت احب مدونتها
واحب سوالفها
دمها خفيف
شربات على قولة المصاروة
عسل المانى من الغابة السوداء
لووووووووووووووووووووول
والله ولهان على سوالفها ماادري شخبارها
خسرت بالبورصة
ماادرى زعلانة على اسيل العوضى
اويمكن اشتغلت مذيعة
هههههههه
يبا الى يعرفها والى عنده اخبارها
يسلم عليها ويقولها الكظماوى المزيون يسال عنج ويقول
ترى طالت الغييييييييبة
وسلامتكم وتعيشون
ولاتنسون الاستبيان يالصواريخ

ايام مباركة

السلام عليكم

ايام مباركة

العشر من ذى الحجة

العمل الصالح فيها افضل من ايام السنة

فضلها اكبر من العشر الاواخر فى رمضان

ويوم عرفة افضل ايام السنة

لا تفوتكم هذة الايام

بعمل صالح طيب

قراءة قران

صدقة

صلة رحم

تصالح مع صديق عزيز

صيام

اضحية

وبالطبع

هنيئا لمن كتبت له الحجة هذة السنة

الله يتقبل منا ومنكم

ومن المسلمين

...

كظماوى وكويتى ومزيون

وهى تحبه ..اسمر وحنون

السلام عليكم

شلونكم شخباركم

مبروك استقالة الحكومة

ومبروك هوشة مباراة الكويت والقادسية بعد

ومبروك حل المجلس قرب

....

استكمال لموضوعى قبل جم يوم

الى كان عنوانه

احبها متينة ...متروسة ومزيونة بعد

تصدقون شفت بقناة ام بى سى 4

تقرير من يومين

يقولون ان 75 % من الرجال

يفضلون المرأة المكتنزة

يعنى ذوقى طلع عالمى ..شى والله

..

المهم انا سالتها بعد مثل ماهى سالتنى

قلت لها شنو مواصفات الجمال عندك ..

ردت على وقالت

اول شى يكون حنون ..امممم

وكريم ما يقصر واياى...

ويحب اليهال ..هذة ضرورية اكيد...

والشكل ..؟؟

ماابيه يكون جميل يلاحقون البنات وهو معاى ..اها

او يكون احلى منى يعايرنى ويتكبر على ..مضبوط

مملوح شوية مو خفس مرة وحدة..اها عرفناها هذى ..

بعد يكون اسمر ... مضبووووط هذة حلوة وايد:)

جتوفه عراض ..ماشى

اطول منى ...هذة ضرورية ...

مايكون مكرش..الحمدلله انا عدو الكرشة والمرأة لوووووووووول

حواجبه عراض

لووووووووووول

اول مرة اسمع ان الحواجب مهمة ..؟؟

....

الصراحة اهتمامكم بالتفاصيل غريب

...

..

.

نتائج الاستفتاء الاخير

قو قو كلكم

شلونكم شخباركم

اول شى مشكورين على المشاركة الحلوة

فى الاستفتاء الاخير الى كان سؤاله

الصفة الى ربعك واهلك يوصفونك فيها هى ..""

طبعا الاجوبة كانت مختلفة ومتنوعة

ذكى
7 (30%)

كريم
6 (26%)

نحيس
1 (4%)

كشخة
2 (8%)

مملوح
5 (21%)

مطيور
1 (4%)

كريكرة
4 (17%)

شايف روحك
3 (13%)

وانا اكثر شى عجبنى غير اختلاف الاجابات هو صدقها

فبعض المشاركين اعترفوا بانهم شايفين روحهم الله يكافينا شرهم وى وى

زين منهم يدشون على بلوقى واشوة انى للحين من مستواهم الظاهر لووووووول

بعض المشاركين اعترفوا بانهم كريكرات

لووووووول

وهذيلا سهل تعرفهم

من تشوف اول المشاركة تولول وتقول لوووووووول

تعرفون انها من فئة المكركرات الكريكرات لووووول

واقولهم عليكم بالعافية والله يجعل طينتكم خفيفة دوم :)

وبعض المشاركين والمشاركات يشوفون روحهم اذكياء وهى اكبر نسبة

يعنى الربع والربعات مو هينين والله

اثارينا يا اهل المدونات مو شوية يالبلد بس للاسف محد معطينا ويه :)*&*

وبعدهم 6 مشاركين ومشاركات طبعا يقولون انهم كرماء فهذيل بعد جبدى والله يهنيهم

ويهنى ربعهم فيهم واحلى شى يكون عندك رفيج كريم

هى طلعات هى عشيات

هى عصاير هى بردات لوووووووووووووول

انت بس اركب السيارة وقط ويهك وهو يقوم بالباجى :()(

وعندنا طبعا بعض المشاركات يقولون انهم مملوحات وانا اقولهم الله يزيدكم ملح وايمان

ويخليكم لازواجكم اذا كنتوا متزوجات ويرزقكم من يقدر جمالكم اذا كنتوا عازبات بعد شتبون ()*

واخيرا فى اجابات خطيرة جدا وحدة تقول انها مطيورة لووووووووووووووووووووووووول

شكلها بالثانوية والله اعلم ووحدة او ثنتين منحس لا يحووووشك

اكيد وحدة منهم بيتها بالقرين والثانية تدرس بالتطبيقى هذة توقعاتى والله اعلم

مشكورين مرة ثانية ولاتزعلون من تعليقاتى ترى كلها غشمرة ونشوفكم على خير

كظماوى وكويتى ومزيون

احبها ....متينة :)

صبحكم الله بالخير

شلونكم كلكم

والله البلد فالتة والامور تضيق الخلق

بس شنقول

الله يصلح الحال ويهدى ولاة الامور

لصالح الناس والوطن ..

المهم تعرفون انا سياستى فى المدونة انى ما اتكلم عن السياسة الا نادرا

لسبب بسيط

ان السياسة تارسة الجو عندى

فى البيت

فى الدوام

مع الربع

حتى سايقنا اذا قام يسولف يتكلم عن السياسة

علشان جذى

المكان الوحيد الى اتكلم فيه براحتى بدون سياسة

هو المدونة

واشكركم على متابعتكم لى

ومشاركتكم للمقالات الى رايحة فيها الى انا اكتبها

طبعا مو كلها رايحة فيها

شى رايحة فيها

وشى ياية فيها

لوووووووول

شسوى خنت حيلى انا

قاعد بروحى اليوم تعبان مو مداوم

تونى متريق

وشفت التلفزيون

وقريتلى جريدتين

كلهم مرض بمرض

...

طبعا هذة المقدمة مثل ماعودتكم

مالها شغل بالموضوع

لووووووووووول

سالتنى شنو مواصفات الجمال عندك

مباشرة وبدون كلك ولا عقد زايدة

انا احب البنت تكون متينة شوى

مو بطة مدربحة مرة وحدة

لكن احبها متروسة

مربربة ماتبين عظامها

مو عصلة دق العود لى طاحت تكسرت

ولا حاشتك عورتك بكوعها جنها صبى ...

بعد احبها حنطاوية..برونزية..سمرة على الخفيف

مو عبدة وكلنا عبيد الله

مو صقنقح..لا لون كويتى حاكته الشمس بنعمومة

مو بيضة كاشفة ولا مصوفرة من فقر الدم ...

واحب ويهها يكون مدور ..واى على الوجه المدور فتان

واذا كان شعرها كاريه..اعتقد ماكو احلى من هالجمال..

طبعا مو اطول منى يعنى بحدود 160 الى 165

واعشق صاحبة الصوت المختفى..

ماتسمعها وهى تتكلم

تظنها توسوس وهى تهمس بالحروف

لان بعض البنات لا يحوشك

طقاقة على سنجة عشرة

..

طبعا هذة المواصفات بخيالى..

ذوقى طلع جذى..

ساعات افكر من وين يبت هالذوق..

لما القى الجواب اضحك على نفسى

واقول

والله انى مو هين...

وسلامتكم وتعيشون

:)

كظماوى وكويتى ومزيون

الناجحون..والفاشلون

اللهم اجعلنا من الناجحين دنيا واخرة يارب

شكرا لمن اعد وكتب هذا المنشور الجميل

غشامة البنات

الله بالخير كلكم

اول شى مو تعصبون

على العنوان

ذكروا الله وهدوا

ماشاء الله البلوقات ثلاث ارباعهم بنات

الله يزيدهم ويخليهم لاهلهم

وعودة لمحور حديثنا لووووووووول

جنه من صج الحين

يالله الحجى ببلاش

يعنى مذيعين التلفزيون احسن منا لما يقطون بدليات

امس ايمان نجم تقول انها مملوحة

وقبلها عاشور نسيت شسمها بعد عند روحها ملكة جمال

ترى كلامهم صحيح لان معايير الجمال تختلف من انسان لاخر

المهم مو هذا موضوعنا

لوووووووووول

كل هالقرقة ومو هذا الموضوع

امس بالجامعة

بنات بجيب طوارق

مساكين حايسين حووووسة

يبون يرجعون قرى

وسيارة وراهم

نزلت وحدة منهم تعلمها شلون ترجع

روحى شوى ..ردى شوى ..لفى يمين..لفى يسار..

البنية خنت حيلى الى تأشر

والى تسوق ميتة من الضحك

وقعدوا الله اعلم

ربع ساعة اكثر اواقل..

طبعا حاول بعض المخلصين من ابناء الوطن مساعدتهم

وشفت واحد مر بالسيارة قالهم تبون مساعدة..قالت له الى بره ..لأ لأ خالصين نقدر نطلع

اظن..واعتقد..انهم للحين قاعدين يحوسون بالسيارة بمكانهم لوووووووووول

نحن معشر الشباب نعتقد ان سياقة البنات سبب رئيسى للغشامة فى الشوارع..والله اعلم

شوفوا عاد بتردون عن الزف والنجرة والتعيب

ترى ماعندى كيرى ميرى

ادق على 777 على طول

وسلامتكم وتعيشون

كظماوى وكويتى ومزيون والحمدلله مو غشيم بالسواقة

دفاشة...او سنع ..!!

( موقف حقيقى وليس من صبيان افكارى )

رن التليفون النقال..ترنتن ترنتن ترنتنيتتتييين ( نوكيا 6751)

انا ..نعم

الطرف الثانى ..الو صباح الخير( الصوت متعصر ومنتهى )

انا صباح النور ياهلا..تفضلى ..

معاك ( ..)

انا..همم فلانة عفوا ماعرفتج

فلانة الى بالقطاع المالى ...

اى نعم ( هى موظفة وانا مسؤول فى قطاع ثانى )

هى حبيت اكلمك عن موضوع مدير الدائرة القانونية ..

لحظة اختى ..ليش ما اتصلتى على تلفون المكتب؟؟

هى ..ما اعرفه ..!!

انزين من وين حصلتى تلفونى النقال ..؟؟

هى ..خذيته من سكرتارية المدير..

طيب تفضلى شنو الموضوع..؟؟

هى ..الوضع فى مكتبنا لا يطاق..وانا ..

انا قبل لا تكمل كلامها ..خلاص كتبى موضوعج بكتاب ودزيه بالبريد الرسمى وانا راح اعرضه بعدين

هى ..خير ان شاء الله

انا..مع السلامة ..

جك

جك ...

دفاشة ..والا وضع طبيعى !!

الرومانسية بين الزوجين تنتهي بعد سنتين و6 أشهر و25 يوماً

مساء الخيرات والنيرات

شلونكم ويا الجو الحلو

غيم ومطر وبراد

الحمدلله يارب تزيده وترحم عبيده ..

***

المهم عنوان الموضوع( اضغط علي العنوان لتقرأه ) قريته اليوم بالجريدة

دراسة بريطانية تقول

ان الرومنسية تقل بين الزوجين بعد

سنتين وستة اشهر و25 يوما

للاسف نسوا يكتبون وجم ساعة لزوم الدقة

بس ما عليه

..

ودى اسال اخوانا المتزوجين والمتزوجات

الرجال منهم والنساءات

لوول حلو ةالنساءات هذة هااه

جم تدوم الرومنسية بينكم يامتزوجين

اول شى شنو الرومنسية

هل المقصود الحب المطلق

او اظهار العواطف

او التغزل بين الزوجين

او اشياء ثانية اتركها لفهمكم جميعا

انا ساعات اذا كنت بالسوق اشوف رومنسيين وايد

البنت ماسكة ريلها من زنده

ماادرى تخاف ينحاش منها

او يبوقه احد

او يمكن بردانه تبى تتدفى

وساعات اشوف زوج وزوجة

يطالعون بعض بنظرات

اعتقد لو يحصل حق كل واحد فيهم

جان يكفخ الثانى باكبر ماعنده

لاحول ولا قوة الا بالله

...

انزين بالبيت شلون العلاقة بين الازواج

انا اتوقع اذا صار الزوج وزوجته بروحهم بالبيت

وتوهم متزوجين

وماكو عيال

وناسه حده

ضحك وغشمرة

وهيصة وزنبليطة

وسهر لى تالى الليل

اتخيل الرومنسية بينهم

يتهابدون بالمخدة فى الصالة

او يلعبون جنجفة

اونو مثلا

او اذا هم متخلفين شوية

الباشة الخايسة

مع ان الباشة الخايسة لازم اكثر من اثنين

بس عادى

يمكن الرومنسية مثلا

يدلدغها

او اذا صار دفش

يعطيها كوع على جنبها

ماادرى عاد البنات شنو الرومنسية عندهم مع الرياييل

تلبد ورا الباب تخرعه قبل لايدخل الدار مثلا

او تطفى عليه ليت الحمام وهو داخله..

افكار رومنسية عادية يعنى مو ابداعية وايد

المهم

اذا تزوجتوا مستقبلا

او اذا كنتوا متزوجين حاليا

ديروا بالكم

ترى الرومنسية حدها الى قلت لكم

سنتين ونص وجم يوم

وبعدها

طنطططاااان

عندكم حريمكم ورياييلكم

طقوهم طق ترى عادى

شوتوهم

عضضوهم

ترى هذا الوضع يصير باحسن العوايل فى بريطانيا

وسلامتكم وتعيشون

احلى والذ عشر اشياء

الله بالخير كلكم شلونكم شخباركم..

ابى اكتب لكم الذ عشرة اشياء اكلتها وذقتها

وللحين احبها على بالعافية

تف تف تف واهل العيون الحارة يذكرون الله

لوووووووول

...

طبعا مو بالترتيب

لكن حسب الى اذكره

1- لقيمات الوالدة الغالية الله يطول عمرها

2- زنود الست من البحصلى بمشرف

3- كنافة بين نارين بالجبن من الكنفانى

4- عصير كوكتيل من التابعى بالديرة

5- شوربة قرع من لانوتر بالمارينا

6- عصير عوار قلب من عصيرات الضاحية

7- برد ليمون بعد من الخباز ( مو طبيعى يدوخنى )

8- عصير هولا هولا من لانوتر بعد

9-موكا الككاو من ستار بوكس

10- بيتزا قيصر من قرطبة

...

عاد ذكروا الله على ذوقى الحلو وقولو لى الحين شنو احلى الاشياء الى ذقتوها

وعلى بالف عافية

لوووووووووول

دكتور تكفة جابلنا ياادمى

داومت هالاسبوع بالجامعة ان شاء الله اتخرج هالفصل تعرفون الفصل الاخير شلون غثيث

مالك خلق تداوم ولاتكتب تقارير

المشكلة مشروع التخرج دكتورنا المشرف علينا سعادته يقول مو فاضى

ابى اعرف شلون مشرف علينا ومشروع تخرجنا ويقول كتبو الى تبونه

يعنى شسسسسالفة حرام عليك يادكتورهذة وظيفتك اتق الله فينا جابلنا ساعدنا

ماتقدر اعتذروخل الكلية تبتلش بالى بدالك

مو تشتغل معانا شغل نص كم و قص ولزق افهم يا ادمى

احنا دراسات عليا مو سابع متوسط الله يعينا يارب

ضحكوا شوي لوووووووووووول

لووووووووووول
اهم شى احترس من تقليد الاسم كاااااااك

عيدكم مبارك

عيدكم مبارك

وتقبل الله طاعتكم

وعساكم من عوادة

والله يحفظ بلدنا الغالية

الكويت

ملاحظة الصورة منقولة من فليكرز

خلونا نشجع بعض على الخير

نبى نشجع بعض ونواصل حماسنا لاخر الشهر الفضيل

ياليت كل واحد ووحدة يقول جم قرأ من القران الكريم حتى اليوم ...مافيها رياء ولا مفاخرة لان احنا مانعرف بعض الا قليل منكم والله اعلم

انا عن نفسى باقى لى شوى واخلص صورة النساء ان شاء الله :)

همتكم بالربع والربعات :)

يا حلاتكم بدون مكياج

اليوم اول ايام رمضان والحمدلله عساكم من عواده اجمعين

الموظفات بالدوام عندنا صاخين وهادين وغالبيتهم بدون مكياج

والله شحلاتهم بدون مكياج اسنع واحفظ لهم..

يوم كنت صغير كنت اعتقد ان المتحجبة والمنقبة هى السنعة

وان الباجين السفور رايحين فيها..

لما دخلت الجامعة تغيرت النظرة شوى..

لما توظفت واحتكيت بالبنات اكثرعرفت ان الحجاب والنقاب ماله علاقة مباشرة باخلاق البنت..

نعم انا اعتقد ان الحجاب واجب فى الشريعة لكن للاسف بعض المحجبات ودك تشوتهم فنقر من تصرفاتهم البايخة وطبعا لبسهم الى مثل ويوههم..

وبعض البنات السفور سنع وتكانة وثقل وتحس انهم طالعين من بيت محترم..

واكيد فى بنات محجبات ومنقبات غاية فى الاخلاق والدين والادب هذا شى ما عليه خلاف...

المهم يا بنات والله لما تيون الدوام بدون مكياج احسن لكم واحسن لنا احنا بعد...

البلوة كانت فى دوام الجامعة

والحمدلله السنة الدوام يبدى بعد رمضان شى اهون من شى...

قريت مرة جملة اعجبتنى حيل ورسخت فى ذهنى..كانت سؤال حق البنت الى تتمكيج وتطلع يقول السؤال..

لمن تتبرجين ؟؟

مبارك عليكم الشهر

*** الصورة من الموقع الحلو http://flickr.com/photos/ebad_alrahman واتمنى تزورونه ***

مبارك عليكم الشهر واعانكم الله على صيامه وقيامه

ليلة فى المارينا

قوة يا الغاليين شلونكم

البارحة رحت المارينا

عاد انا مو عادتى اروح السبت او اليمعة بالليل

اكره الزحمة واللوية هناك..

صليناالعشا بالمارينا وبعدين رحنا مطعم لانتر

احب هالمطعم

اروح له العادة بالشهر مرتين..

مرة الى بالفنار

ومرة الى بالمارينا

رحت الى على مرة البحر وماعجبتنى القعدة وحتى الخدمة الى هناك ...

بالمارينا تشوف احدث مخلفات البشر فى الكويت

تشوف العقد على اصولهم

وتشوف اخر موديلات البنات وخبالهم

فرجة ببلاش يعنى ...

طلبت وجبة هامورمع ربيان مشوى

وعصيرى المفضل اسمه هولا هولا

هههههههههه

هو اسمه جذى لكن فظيع موز وشمام ومنجة..

قعدنا ساعة زمان بالمطعم..بعدين تمشيت ورحت الفيرجن..

احب اتمشى فى هالمعرض...

اخر مرة شريت كتاب حق الدكتور المزيدى

حلو وخوش كتاب خفيف ولطيف على قولتهم

طبعا لبس الاوادم فى المارينا يزعج النظر

ساعات احس عينى تعورنى من لبس الشباب والبنات

قصات الشعرحدث واشبع من الحرج...

ماا حب اوصف شنو لابسين بس ملابس حقيقة

استغرب شلون البنية او حتى الولد يطلع من بيتهم بهاللبس

شنقول الله يهديهم ياى رمضان ويحسون بروحهم شوى

...

المهم تعشينا وتمشينا ووسعوا صدورنا شوى

وردينا البيت

وسلامتكم وتعيشون

ومبارك عليكم الشهر مقدما

انا بعد اخاف من الحب ..واكرهه

الى ما يحب ليش يعيش فى الدنيا ...الى يحيا وحيد ومنعزل شنو الى يربطه بهالكون الى احنا فيه ..ما اقصد بس الحب الى يكون بين رجل وامراة ..اقصد الحب بكل انواعه ..حب الوالدين ..حب الابناء..حب الاصدقاء..وحب الزوجين ..وبالتاكيد اعظم حب هو حب المؤمن لربه سبحانه وتعالى ...

ابى اتكلم عن الحب بين الزوجين ..او اوسعها شوى الحب بين رجل وامرأة ..وهم اقصد الحب العفيف الشريف..الى يكون نهايته زواج وارتباط...مو حب الهوى والفاحشة ..او حب المتعة الحرام ..انا اتكلم عن الحب كعاطفة عميقة فى البشر ..احساس غريب فى الصدر...هزة ورعشة فى القلب ..مايعرفه الا من جربه...

انا جربته..مو صحيح القول انه وقع فى الحب..الحب ما تقع فيه..الحب تغرق فيه..الحب يلبسك وتلبسه..الحب سكر العقل عن نظر غير المحبوب..الحب كهرباداخل الجسم..والله الى ذاق الحب صعب عليه يتخلى عنه..لا تلومون من يتحطم بسبب الحبيب...لا تلومون من ينهار بسبب الفراق..لا تلومون الى يوسوس بصورة حبيبه او صوته او لمسته او حسه..

ترى الحب شى صعب صعب ما ينوصف..ياليت الحب ينشرى بفلوس والله لاشتريه واملكه..ياليت الحب ينخش بمكان ومايضيع والله لاحبسه..ياليت الحب ينمسك اوينلمس او ينلم جان المه بيدى وجسمى وادخله بضلوعى حتى ما يفارقنى من احبه..

للاسف كل هذا ما يصير

الحب ما ينشرى ..تحب والطرف الثانى ما يحبك او مايدرى عنك او يحب غيرك

وللاسف الحب ما ينشرى ولا ينباع...وللاسف الحب ما ينخش لكنه مثل الهوا يطير بلحظة وينتهى ...

وللاسف الحب ما ينمسك ولا ينلمس لكن شى يدخل بقلبك ويهزك هز حتى يذبحك على اعتابه..

علشان جذى اخاف من الحب

اكره الحب

احقد على الحب

بقدر ما هو لذيذ بقدر ماهو عظيم بقدر ما هو شى كبير فى الحياة

فهو كذلك لئيم وخائن ومحطم للقلوب..

ايها الحب لو كنت تسمعنى فانى اكرهك..لانى عاجز امامك...

استغفر الله

يارب سامحنى ان اخطيت

وسامحنى ان بالغت..

وارزقنى محبتك الخالصة ومحبة الصالحين من عبادك..

وبارك لى فى محبة من احب فى الدنيا ..

ياكريم

كظماوى وكويتى ومزيون..لاقى من يحب وخايف من فراقه ..ولاحول ولاقوة الا بالله

موقف محرج حددده

السلام عليكم شلونكم شخباركم صار لى موقف محرج حددده فى الدواممم

اول شى علشان ما تخربطون انا اشتغل وادرس وان شاء الله اخلص عن قريب جدا...

عندنا موظفة فى الدوام بنت ناس الله يستر عليها كبيرة مو صغيرة ( اكبر منى وايد) وعلاقتى معاها علاقة عمل واحترام اذا صار فى اجتماع اوفرق عمل او شى من هذا نلتقى..الموظفة صارت لها مشكلة فى الدوام وتناجرت مع المدير العام طولت سالفتهم قامت وقدمت شكوى ضده تمت القضية مدة طويييلة حيل واخيرا طلع الحق معاها وعطوها الى تبى ..شفتها عند مكتب واحد من المسؤولين لا اراديا جان ابارك لها واقوم واسلم عليها بيدى وهى الاخت بعد مدت ايدها وصافحنا بعض...

اول شى انا اعتقد ان مصافحة الرجل للمراة الغريبة عنه حرام وهذا شى ما اناقش فيه والحمدلله..

الشى الثانى علاقتى معاها اصلا رسمية مو لى هناك بس ماادرى شلون سويت هالحركة ماادرى ليش مستانس ان رجع لها الحق او شى ثانى بس التصرف كان حده تلقائى وعفوى ..

طبعا هى سفور ومرة كبيرة واعتقد ماعندها مانع تصافح الرياييل لكن اكيد استغربت منى هالتصرف

..التفسير الوحيد الى يمكن ان يطوف هالسالفة

انى حسبتها مثل خالتى او اختى الكبيرة بس عاد اقدر اقولها هالشى جان تكفخنى بالطفاية الى على مكتبها لووووووول

..على العموم اعتقد الموقف بايخخ حده وان شاء الله ما تطبون بمثل هالمواقف

الحمدلله الذى نصرنا على القوم الظالمين

8/2 يوم الغدر يوم الغزو العراقى يوم الخيانة العربية يوم الحقد والحسد

الحمدلله الذى نصر الكويت الغالية واهلها على القوم الظالمين

الحمدلله الذى نصرنا على الغزاة العراقيين

الحمدلله الذى اعاد لنا بلادنا من يد البعثيين المارقين

الحمدلله الف الف مرة

الحمدلله عدد نجوم السما

الحمدلله عدد حبات الرمل

الحمدلله كثر زخات المطر

الحمدلله كثر امواج البحر

عاشت لنا الكويت حرة وغالية وعزيزة

يالله يارب تحفظ بلادنا وتهدى حكامنا وتصلح شعبنا وتنجينا من مكر الماكرين

امين

امين

امين

ملاحظة صورة العلم الكويتى من موقع فليكر

للمصورة منطلقة بطموحى

الى يعرفها يتشكر منها

انا والتدوين ..علشان الغالية علبة الوان

انا والتدوين علشان الغالية علبة الوان

المدونة الجكليتة علبة الوان دزت لى هالتاق

وانا اول شى اشكرها وثانى شى اجاوب على الاسئلة

وان شاء الله تكون اجاباى خفيفة على قلوبكم

متى بدأت تدون ؟ و شلون دخلت عالم التدوين ؟

بدوت ادون من سنة 2005

ودخلت العالم هذا وانا احوس بالنت فى الدوام خبركم اكل ومرعى وقلة صنعة والحمدلله

شنو كان انطباعك في البداية ؟

فى البداية كنت افكر هل احد راح يقرا لى وهل القى شى يسوى اكتبه وشنو نوع المقالات الى اكتبها ؟

قررت ان كتاباتى تكون خفيفة ما اتكلم بالسياسة

علشان جذى اعتقد ان كتاباتى ما تعكس شخصيتى الحقيقية يمكن فعلا انا غشمرجى مع الربع واحب الضحك والنكت والدقات لكن المدونة تعكس جانب واحد فقط من شخصيتى ...

من أكثر واحد تهتم بتعليقه علي بوستك الجديد ؟

استانس لما القى اى تعليق يعنى انا ليش كاتب هالمقالات مو علشان الناس تتجاوب معاها وتعلق عليها

واحب اشوف تعليقات ناس جديدة فى مدونتى ..

لكن بعض المدونين والمدونات استانس جد لما يمرون على لسبب بسيط هو انهم كانوا من اوائل الناس الى تعرفت عليهم فى البلوقات مثل ابو وليد العتيبى

وعتيجة هانم واستكانة التكانة وسيلفر رين ( ماادرى وينها ) وكويتيياه ..وغيرهم..

على العموم والنعم فى الجميع

مين اتعرفت عليه من خلال المدونة و نفسك تتعرف عليه في الحقيقة ؟

سؤال صعب شوى ..)

ايه أهم حاجة اتعلمتها من عالم التدوين ؟

ان الحكم على الناس من خلال افكارها واقوالها اصعب من الحكم على الناس من خلال اشكالها ومناظرها لكن فى المقابل هذا الحكم يكون ادق واقرب لمعرفة الانسان..

عسى فهمتوا شى من الاجابة لووووووووول

اشنو أكثر حاجة كرهتها ؟

كرهت الى يتكلمون على الدين والى يدعون للرذيلة ويلبدون ورا الكمبيوتر

الله يهدينا واياهم

ممكن تعطى مثال عن اللي بتحلم تلاقيه ؟

ههههههه شسسالفة اشوف قلبنا سوالف نجلاء فتحى وفاتن حمامة

الحمدلله الى ابيه ملاقيه وانا بخير ونعمة الله يديمها علينا وعلى المسلمين :)

حاسس ان التدوين له تأثير ؟

طبعا له تاثير كبير جدا وفى الكويت وايد مواضيع تم اثارتها عن طريق المدونات واخرها الحملة ضد جريدة القبس الى تبناها ابو وليد ومجموعة من المدونين وكان لها تاثير كبير جدا على الجريدة وتعرفون موضوعها قبل جم يوم ..

كلمة اخيرة ؟

اشكر الغالية علبة الوان على طلبها لى ان اكتب هالبوست واتمنى كل واحد او وحدة يكتبون مقالة فى مدوناتهم يتذكرون ان كلامهم محاسبين عليه وان ظليمة الناس شينة ويبتعد عن ايذاء المسلمين

واخيرا اهدى هالتاق حق الكشتة ام الكشتات والهبات والغيبات

عتييييجة هانم واختها الغالية ام نبيل الى نسمع فيها وما نشوفهااا

وشكرا للجميع

كظماوى وكويتى ومزيون بعد

الخيران

قوة يالربع شلونكم شخباركم

طافكم منتزه الخيران..

الاهل حاجزينه ورحت نمت عندهم

عندى سوالف اقولكم عنها بعدين

الحين الصراحة حدى يووووعااان بروح اتعشى

حياكم

فطاير بربر

لووووووووووووول

تحديث على قولتكم

واقولكم عاد رحت الخيران وانا احب الخيران خاصة عقب ما ضبطوها ونظفوا المكان

وخلوه محترم اكثر من ايام قبل ايام الخمة والمجعرة الزايدة

شاليهنا موقعه عجيب بنص الشاليهات والجو وايد حلو مع ان الديرة كانت مغبرة

وبالليل درجة الحرارة وصلت عندنا 34 تقريبا مع النسناس البارد ..

القعدة وااايد حلوة ...

طبعا بالنهار كله نوم لي صلاة الظهر تقريبا

ونقعد بالشاليه لى قريب الساعة خمس وبعدين نطلع شوى اما نتمشى واما نروح المسبح

مسبح كبر حق الجميع ويصلح لما نودى اليهال معانا

اما الروضتين فاوقات حق الشباب واوقات حق البنات ..

الاهل لما راحوا الروضتين يقولون شافوا هوايل من البنات..

علبوا كلهم بنات مع بعض ماخذين راحتهم بلبس السباحة بكل اشكاله..

المغربية نطلع الطاولات والكراسى ونقعد بالحديقة شاى ونسكافيه وقهوة عربية وحب شمسى ومجابلين بعض سوالف لما نشبع علينا بالعافية عاد مو تصكونا عين

لوووول ماشاء الله

الثيل الاخضر عجججيب ونظيف واليهال حوالينا بالقوارى او يلعبون كرة ..

لى صار الليل بعد العشا الصلاة والاكل

نلعب جنجفة

طايحيله اونو

وساعات نلعب الباشة الخايسة

ماادرى تعرفونها والا لا ..

لللللللووول

فى اماكن ثانية هم حليوة وتونس

بالليل كلش ساعات نسبح بالبحروساعات نحدق على اليال

ونروح المارينا فيها مطعمين

وقهوة وهم برد الباسكن..

طبعا فيه صالة العاب كبيرة وفيها شرمبى لكنى مااحب شرمبى احسه يغث وصلصته تلوع جبدى ..

الى يحبون يسوقون قوارى ياجرون والى يبون يركبون الحنطور يركبون والى يبون يخمدون يقعدون بالشاليه ويخمدون لما تطلع النومة من خشوومهم

لووولل

طبعا الاشكال الى فى الخيران نفس الاشكال الى تشوفونها فى السوقة والجمعيات

البنات كلهم لابسين طقة وحدة

ماادرى شسالفتهم

بلوزة طويلة وتحتها جينز او بنطلون وفى شغلة هابين فيها انتوا يالبنات

يسمونها الليجنز .وهو هيلاهوب ضيج وستريش بس مرقعينه مغيرين اسمه

فى بنات يفتهمون شوى ويلبسون بلوزة وبنطلون وساع مرحوم والدينهم على الاقل

وفى بنات يمالهم البقارة بنطلون ضيج والبلوزة قصيرة وضيجة بعد..يعنى ماادرى مايشوفون روحهم قبل لا يطلعون والا هم صخول الله اعلم

يعنى هلاقة مطورة وقلة حيا بعد لكن الشرهة مو عليهم على امهاتهم الى ما يفتهمون

الشباب نفس الشى يوم هابين بالتقرع وحك الشنب

ويوم هابين بالكشيش وعرف الديج والله ماادرى شسالفتهم

المهم انى الحمدلله استانست مع الاهل بهاليومين

وان شاء الله كلكم تستانسون بعطلتكم..ونشوفكم على خير

كظماوى وكويتى ومزيون

طبعا الصورة هذة بحر الخيران وقت الشروق الساعة 5 الفجر والعادة احنا نسهر لى الفجر وبعدين ننام

وشكرا لتلفونى العزيز نوكيا على مشاركته معاى

لووولل