تحديث تحديث تحديث
***
مسابقة القرقيعان الاسبوع القادم
نتمنى مشاركة الجميع
***
بربليوشة وفاتو
خلكم مستعدات يا لجنة التحكيم
لوووووول
***
مبارك عليكم الشهر جميعا
والله يحفظ ديرتنا من كل شر
امين
وبهالمناسبة الحلوة والعزيزة
اتمنى من البنات يخفون مكياجهم
لا لا
لايحطون مكياج
تكفون لبسوا مثل الاوادم
احترموا الصيام
احترموا هالشهر الفضيل
اللبس المسخرة يوزوا عنه
يعنى الواحد غصب ساعات يروح جمعية يطرشونه اهله
او يروح مجمع الوزارات
مناظر مو طبيعية
ماجنه ناس صايمة
شلون ماعندهم احساس
ماادرى فيهم شى
او يعاندون
....
الله يهديهم
المهم يمعودين
مبارك عليكم الشهر
وعساكم من عوادة
وموعدنا على القرقيعان
بسوي حفلة هنى
تجهزوا كلكم
نبى نسوى مسابقة
احلى قرقيعان
صج مو كلك
اعلمكم تفاصيلها لاحقا
لوووووووووول
حلوة لاحقا عجبتنى
على خير نلتقى
كظماوى مزيون
هناك ٣٠ تعليقًا:
اهلا كظماوي .. علينا وعليك يارب .
اما بالنسبه للبنات يقولك ( كل ممنوع مرغوب ) يحبون يطبقون هالجمله خاصه في هالشهر مادري ليش لوووووول
الله يهديهم يارب ويصلحهم .
عيل انا اعجبتني كلمه ( كلك ) شخبااااااااااااااااري هالكلمه لوووووووول
اشتبينه انسوي بالقرقيعان قول من الحين عشان انتزهب .. اخيطلي بخنق على الاقل وفنتق فيه اكتب عليه اسمي وشتريلي جيس قرقيعان ودنبك حق الطرب .. خو تدري مايحله الطرب الا معاه لووووووول
مساك الله بالخير كظماوي
علينا وعليك وكل عام وانت واسرتك وكل من تحب بخير:)
بناتنا يبيلهم قرصة اذن
بس هذا ما يمنع ان شبابنا يبيهم غض بصر
بتقولي صعب؟
بقولك الموضوع يبيله شويه ممارسه
بعدين يصير احتراف غض بصر
:)))
وبالنسبه حق القرقيعان
ترا انا زاهبه
دراعتي والبخنق وكاشخة
:)
أولا مبارك عليك الشهر و علينا و عليك و عيدك مبارك من الحين ..
عاد تصدق مجمع الوزارات بروحه لو الواحد يروح يصور الأرقوزات اللي هناك جان يطلعله بفلم كوميدي ما حصلش !!
بتسوي قرقيعان ؟ أعرف سوالفك التوفيرية مالت الجعوص النيادة حدك الصيداوي المحزر حق تكسر الضروس لا و ملقطه من عيال أخوانك
لوووووووووووووول
مبارك عليك الشهر وكل عام وانت بخير
وعسااااااكم تعودونه وكل سنه وتصووووومونه :)))
مبارك عليك الشهر يا كظماوي زي حلاتي
وسلم ولدهم يالله خله لامه يالله بمناسبة القرقيعان
وعيدك مبارك مقدما
مع تحيات محل الشهابي للخامات الرجاليه البلوكات بلوك 5
مو دعايه حق محلنا لوول
علينا وعليك ان شاءالله
اووووكي ننطر المسابقه بشوف شلون صايره :)
كل عام وانت بخير :>
صحح انا مع استكانه خلك حررييف غص البصر
وكل عام وانته بخير
يا حظه اللي يدور مره بيشوفها عدل انا لو منك كان ناشر القصيدة اللي دازها بالايميل بانشرها عناد فيك
يـا صانـع المكيـاج الله يجـازيـك
خليتني مخـدوع فـي شكـل خلـي
الله يحـرق مصنعـك مـع مبانيـك
والمعرض الموجـود في بيكاديلي
ادعي عسى تعمى وتنشـل رجليـك
هـذا دعائـي دوم لا جيـت اصلـي
خليتني اركـض ورا البنت هاذيـك
واشوفها اجمل غـرام ٍ حصـل لـي
قلبي عشقها يا(جيفنشي) توماتيك
وان شافها قلبـي يرحـب يهلـي
هي رحبت بـي وقالـت الله يحييـك
وقالت هلا باللي عشق زيـن شكلـي
وقالت انا اجمل بنت في اللي حواليك
شف حسني الاخاذ وروجي العسلّـي
طالعتها ثـم قلـت هالقلـب يبغيـك
ومن شاف حسنك خلى غيرك يولـي
ابغي اشوفـك دون مكيـاج يكسيـك
وابغـي اشوفـك بالجمـال المحلـي
قالت تبينـي افـرك الوجـه تفريـك
واشيل هالبـودر وروجـي وكحلـي
قلت أي نعم قومي عسى الروح تفديك
ابغـي جمالـك هالطبيعـي يهـلّـي
قالت دقايق راجعـه لـك واراويـك
ذاك الجمـال اللـي لعينـك يسـلّـي
ويوم رجعت لي شربكتني الشرابيـك
وحسيت الارض تدور وانـا بمحلـي
الخد كنه يا(جيفنشـي) سيراميـك
والوجه شارع مثـل شـارع حولـي
الوجـه كنـه بيـت كلـه شبابيـك
من هالحفر في وجهها اللـي يعلّـي
كلـه سبـب مكياجـك الله يجازيـك
خليتني مخـدوع فـي شكـل خلـي
ونصيحتي لكل شاب من غير تشكيك
لا لا اتسـرع ثـم تنغـش مثـلـي
اللـي بـلا مكيـاج خلهـا حواليـك
واللـي تحـط مكيـاج خلهـا تولـي
مبارك عليك الشر يا الكظماوى
D:
كل عام وانت بخير
مبارك عليك الشهر
النور~
***********************
اكرمكم الله بشهر رمضان بعفو
وعافيه و مغفره
مبارك عليكم الشهر
وتقبل الله منا ومنكم صالح الاعمال
وعساكم من عواده
علينا و علييييييك يالشريك
و بعدين أنا أؤيد كلام شقيقتي استكانه
اي والله غضوا البصر!!!
و بعدين حتى لو استاثمت فانت من ناحية اخرى كسبت حسنات من شكر الله على النعمة و الحمد على العافية
و شسالفة القرقيعان؟؟ ترى أنا مالي شغل مو تدبسني فيها السالفة من الحين يا جماعه أبري ذمتي ترى ما شاورني بالموضوع أنا مالي شغل هذا اجتهاد شخصي منه
ليش ما تشاورني مو أنا شريكتك في المسرات و المضرات و لا شي فيه وناسه ما يعلم ما يقول اعرفه هالنوع نوع التغبي و التخشش
ههههههههههههههه
مبارك عليك الشهر
وعساك من عواده
مبارك عليك الشهر
و عساك من عواده :)
بالنسبه للقرقيعان متزهبه و بيومه
بنطركم جدام باب بلوقك :P
عسى الله يهدي الجمييييييع ..
رد وقال البنات !@@
ما أقولك عنصري عنصري عنصري
يا ريت الشباب بعد يحترمون عمرهم وما يدخنون بالإشاره يعني اشكره فاطرين عيني عينك @@
أنا أنا استحييت والمشكله قاط ويهه عندي الي ما يستحي
@@
بس بس ما ابي احش
وبعدين انته شعندك يوم وترك بمجمع الوزارات ها :d
ايي والله الله يتقبل منا قيامنا وصيامنا وصالح اعمالنا
ويهدينا ويهدي غيرنا ويستر عليهم
وناطرين الحفله معني ما ادري ليش شاكه بالموضوع :d
أحس بتكشت كالعاده
:d
اووووووو
نسينا نقولك
مبارك علييك الشهر :d
يا هلا بالمزيون
كل رمضان وانت بخير وصحه يارب
وينعاد عليك وعلى غالينك بالخير ويعينا على صيامه وقيامه انشالله
شخبارك انشالله بخير
شريت فيمتو والا لأ
اهم شي
:)
الحمدلله الكلام مو موجهلي
ماااااااااااااحب المكياج
اللبس ... برمضان ما اطلع كلش الا عقب الفطور
:)
الله شهاللوك العجيب
بعد قلبي بيربل ما تقصر ورايتها بيضه
:**
هذي حقها
:)
بعد قلبي
ما ترد احد
لو انا جان مسكره البلوق وقااااابه
؛)
بانتظار المسابقه
بلبس بخنق ودراعه كلها زري احمر
وترتر ذهبي ... حريجه مو صبا
:)))))))))))))
تحياتي للعايله الكريمه
:)
هلا بفاتو منورة الحتة يالغالية
كلك مصطلح كويتى طفولى يدل على النصب والاحتيال
لوووووووووووول
شوفى سالفة القرقيعان راح اضبطها هاليومين والصراحة ابيج تشاركين معاى فى اعداد المسابقة انتى والشريكة العزيزة بربليووووووشة
اوكى :)))*
استكانة صدقتى ماكو حل الا غض البصر بس ساعات يمر عليج شى يطير العيووون خلى العمى يبقق عيونه من كثر التهول
على قولتهم
يا هولة تهولى
لوووووووووووووووووول
واكيد انتى اول المدعوات لحفلة القرقيعان بس خلج زااااهبة :)
متفائل
لوووووووووول
شوف عن الربربة
خلك جاهز انت بعدابى قوطى نيدو
وحط كحل حق عيونك هالمدقملة
وابيك تلعلع عند باب المدونة
سلم ولدهم يالله خله لامه يالله :)
لووووووووووووووووول
يا فتوة المدونة انت يا ولد
كااااااااك
شاى الضحى وعنيف وفيشة والمباركية علينا وعليكم تسلمون
وابى تشاركون مو تنحاااشون
ترى المسابقة للجميع :))*
ابو وليد
لوووووووووووووووووووول
انا دازها بالسر فضحتنا يا شقول
لووووووووووووووووول
شوف انت حلاتك مجابل القلاف وربعه لا تتحرشس فينى
لوووووووووووول
مستر سلشون والنور تسلمون
بنت الشامية هلا بشيخة بنات ق 10
عاد لا تخلون مسابقة القرقيعان
:)
بربليوششششة
هلا بالطش والرش
هلا بماى الورد والعطر المرشش
هلا بالغالية
شريكة المدونة الغالية
افا عليج بس
انا اقدر اسوى شى من وراج
ناوى على روحى
والا بايعها
والا ناوى على روحى
لوووووووووووووووول
لا تزعلين عاد عن العيارة
شوفى المسابقة حجوة قلتها وتوهقت
بعدين اضبطها معاج
بس جد جد عندى خووووش فكرة
ان شاء الله تعجبج
وابى معانا فاتو
بدال بدلياتها الى تفشل خل تسوى شى مفيد للوطن
لوووووووووووووووووووووول
الخيلاء وقلب طفلة علينا وعليكم
عساكم من عوادة
وناطرين مشاركتكم معانا :)
يو تيرن
هلا هلا بالمعارضة
هلا بالوزيرة المقالة المفصولة
هلا بكل الرونغ سايد والمخالفات والدوريات
لووووووووووووووووول
والله مو عنصرى
هذا واقع
ويلى يسلمج
ماتشوفين برامج التلفزيون
شوفى المذيعات وتخنبقهن
...شفتى مالت قناة فنون
ودى اكفخها على دماغها
بس شنسوى
احلى شى افتكينا من دلوعة الشاشة الخليجية
غثيثة هانم
لوووووووووووووووول
صبا هلا بالناسكة وينج قاطعتنا شسالفة ليش يالغالية عسى ماشر
وبربليوشششة والله تستاهل كل خير
بيضتها كثر الله خيرها
والله ودى اعزمها بستاربوكس بس رمضان والناس صايمة والقهوة مسكرة الصبح خبرج
لووووووول
وان شاء الله تشتركين بالمسابقة وتورينا القرقيعان السنع عاد :))
اهلا بالمزيون :)
لوووووووووووول اهم شي اني اسوي شي مفيد للوطن .
اي والله راح تاخذ فيني اجر اذا سويتلي هالمعروف لووووووول .
خن رقع ابحالي وحسن صورتي جدام البلوقرز :)
أبشر .. انه حاظره افا عليك :)
كظماااااااااوي
شخبارك انشالله بخير
شنوووو شنووووو؟؟
اشمعنا حاط اسم بيربل بالبروفااااايل
:(
متى مسابقة القرقيعان؟؟؟
انا على اتم استعداد ... وبخنقي بالكبت ودراعتي الحمره الزري المقصمله باجر اييبها من الخياط
بقرقع معاااااكم ابيك نسايرني بالسكيك وبين فرجان المدونات
اخاف احد يبوق جيس القرقيعان
ومتفائل عنده سوابق
السنه الي طافت ... لاحق حفيدة بوسانتوس وشاق جيسها
وناط بيت فاااتو وماخذ قرقيعانها
طلبتك اقرقع معااااك
وما علم احد السر الي اعرفه
:))))
انا اشهد ان متفائل ناط بيتنه .. المشكله كوش على قرقيعان اليهال كلهم ماخله شي .. بجاهم وطلع لوووووووول
روح معاها ياكظماوي .. تدري لبنيه تخاف من هالسوالف وحدها رقيقه ويبيلها امهاوشجي مثلك عشان اتصد الي مثل متفائل وربعه .
لووووووووووووووووووووووول
اللهم اني صائمه :d
ورجاءا مقدمة التشمت الي تسطر لي اياها بكل تعليق مالها داعي :d
وبعدين شكووووووووو مبقق عيونك على مذيعات التلفزيون هاا @@
شوف قناة أقرأ
شوف كيف تتلذذ بصلاتك على ال mbc
شوف خواطر 5
أحسن من هالخرابيط الي تشوفها
تثقف :d
بسك من التمقل بغثيثه هانك وغيرها :d
إرسال تعليق