عسى طولة العمر لكم يالغاليين

قوة شلونكم شخباركم

مشكورين على المشاركة بالاستبيان الخاص بالاعمار

ماشاء الله عليكم

شباب الله يطول عمركم ويحفظكم ويخليكم لاهلكم

الى جاوبوا 28 مشارك انقسموا بالصورة التالية

اقل من 18
4 (14%)

18- 22
8 (28%)

23 - 28
12 (42%)

29 - 34
1 (3%)

اكبر من 34
3

...

الى اقل من 18 الله يحفظهم بالثانوية

احلى مرحلة

وقت الشطانة واللعب

والهياتة والعبط

لا مسؤولية ولا حنة

يما عطينى فلوس

يبا ابى اروح الشاليه مع الربع

يمه ماابى غدا الحين

يبا اشترى لاب توب

يعنى هيصة وزنبليطة ...

ومسجات واسواق

من 18/22

وااو هذا العمر صعب

بداية الاحتكاك الحقيقى بالحياة

تكتشف الناس شوى شوى

تعرف الدنيا بشكل ثانى

تبدى تحوشك الدقرات من اهلك وربعك ودراستك ..

تشوف الهيلق وعيال الجخ

تشوف ظلم دكاترة الجامعة

تكتشف ان التطبيقى طايح حظهم

تتحمل المسؤولية بشكل اكبر مع اهلك

تبدى تختار ربعك بصورة دقيقة ...

وتقارن نفسك بالى حواليك على طول

هذة المرحلة مع انى كنت متفوق بالجامعة

وربعى كثر شعر راسى

بس الحقيقة

كانت بايخة ماادرى ليش..

ما دققت فيها وايد وايد ابى اطوفها الحين

****

المرحلة المفصلية

23/28

ااااهه من هذا العمر

تبدى المحاتاة

اهلك يعتمدون عليك اكثر

تبى وظيفة

تبى تتزوج

ربعك يتوظفون قبلك

ويتزوجون وانت ماتزوجت للحين

تحس بالفراغ اذا انشغلوا ربعك مع اهلهم

تكتشف ان فى شغلات يسوونها الى كبرك حركات يهال

تهتم بالسياسة

تتحمس حق الانتخابات

تكتشف ان الانتخابات كلك ونصب

تحب النقاشات والجدل

تهتم بشكلك واناقتك

ما تلبس اى شى

تحب الاماكن المزدحمة والاحتفالات واللوية

تتعرف على شخصيات عامة سياسية واقتصادية

تكتشف ان وايد منهم صورتهم بالتلفزيون او الجرايد احسن من الاصل الف مرة

يطيحون من عينك بعدين...

اذا تزوجت تهتم باسرتك وتتمنى تتوفق بزواجك وبعدين

تربى عيالك

وتحاتى البيت والسكن

وايد اشياء بهالمرحلة

عندى انها اهم مرحلة بعمر الشاب والفتاة

****

29/34

مرحلة الطموح الذاتى

بهالعمر تبدى تهتم بنفسك الحقيقية

تتخلى عن الشكليات

تتحسف على الوقت الى ضاع منك تجامل فيه الناس

تتحسف على بعض الاصدقاء الى عرفت حقيقتهم متاخر

تحاول تبحث عن شى مميز فى شخصيتك

تراودك احلام مواصلة الدراسة

احلام التجارة

احلام الانتخابات

جمعية او مجلس او حتى نقابة مربى النحل

المهم ودك تفوز بالانتخابات

تصير دقيق فى ملاحظة تفاصيل جسمك

شعرك ولونه

كرشك

عضلاتك

حركتك ولياقتك

تبدى تدور نادى او تمارس المشى

عاد شوف

اذا انت ولد جخ او بنت جخ

نادى على البحر

او السالمية او فندق

اذا نص ونص

الاليزيوم او البلانتيوم

اذا تمشى حالك

نادى الاحلام السعيدة او دورة ازالة الكرش بالاصلاح وفاملاه

..

بهالعمر

اذا كنت متزوج...

تفكر بمستقبل عيالك

وللحين تنطر البيت

وتكون بادية عليك علامات ارتفاع الضغط

وتسمع بالكليسترول

واذا كنت مو متزوج

تدور عن الحب

تخاف من قصص فشل ربعك فى زواجهم

مالك خلق حنة المرة واليهال

تشعر بوحدة قاتلة اذا كان كل ربعك متزوجين

لانك صعب تكون صداقات جديدة

اما تصير خوش ريال

او تنحرف وتصير هتلى ابوطير

***

اكبر من 34

بداية النهاية

فى الغالب يكون طاف نص عمرنا

لان اعمار المسلمين

من 60 الى 70 سنة

مثل ماجاء فى الحديث الشريف

يعنى 35 سنة طافت

وبقى وراها 35 والعلم عند الله

تكملها او تزيد وهذا مو اكيد

او ماتطولها وهذا متوقع ولا حول ولاقوة الا بالله

اذا عندك عيال تتعلق فيهم

اذا متزوج وانت صغير تزداد حب لزوجتك

وبنفس الوقت

تراودك افكار قوية

عن الزواج بثانية

تسمع عن المسيار

تسمع عن العرفى

تسمع عن الزواج بدول الخليج شلون سهل ورخيص

تكون استسلمت لقدرك

اما انك تصلح للتجارة

واما انك طرق المعاش

تستهويك المضاربة بالبورصة

تكسب مرة

وتخسر عشرين مرة

تكثر وقفاتك بالعزا

لاحول الا بالله

عمامك وخوالك وعيال عمك الكبار

بدوا يفنقشون

واحد ورا الثانى

تحس انك بديت تكبر

تعد الشيبات براسك

تتعلق اكثر بامك وابوك

تخاف تفقدهم

ماطلع لك بيت

الايجار كسر ظهرك

وتصير حاقد رسمى على الحكومة

تفكر تشترى شقة

او بيت بره الكويت

كل ما شفت البنات والمصبنة بالاسواق

سفلت فيهم وقلت شهالاشكال الوسخة

وين اهلهم عنهم

يمكن كنت مثلهم واكثر على ايامك الله اعلم

...

هذا تحليلاتى وافكارى على المراحل العمرية

ماكتبت كل شى

لانى قاعد ارتجل معاكم واكتب فوقه فوقه

يعنى مو مرتب افكارى ومسجلها

فخذوا وخلوا

لا تدققون وايد

وما كتبت كل شى

طوفت اشياءوايد وايد

وماتكلمت عن البنات

لانى ماادرى شيفكرون فيه

ولاحبيت اخوره بالحجى

اخاف اجرح شعور احد

انا صج اتغشمرواحبكم

واضحك معاكم

لكن مو معناة هذا انى اضيق خلوقكم او ازعلكم

..

الى وصل للحين معاى لهذة النقطة

الله يعطيه الف عافية

ويكون صج مهتم يقرا شنو اكتب

ويكون فعلا بينى وبينه رابط فكرى وعقلى عميق

الى تحملنى وتقبل يطلع على افكارى الصغيرونة

والحين

اتمنى جد تكتبون تعليقاتكم على هالبوست

كل واحد ووحدة ومدة ايده

اقصد مدة كى بورده

لووووووووووووووووووووول

تصبحون على خير

كظماوى وكويتى ومزيون..