اوربا ايام كامينغ

ان شاء الله سفرتى هالسنة حق بلاد الافرنجة

...كل شى اوكى...التذاكر..السكن فندق اربع نجوم مو خمس نجوم...

الطيارة دايركت اهم شى ماكو ترانزيت..

استقبال الفندق بالمطار يعنى ماكو لوية ودور تكسى يوديك وينصب عليك بالسعر...

صرفت فلوس بالدولار واليورو..

معاى بطاقات الفيزا...

شريت بنطلونات وتى شيرتات وقمصان ...تكرمون حتى جوتى خذيت

الجنطة اصلية من مركز سلطان باثنين وثلاثين دينارعيال الذين

ثقيلة قبل لا احط اغراضى ..

بس يقولون سمسونايت ما تنكسر لو تطيح من العمارة

ماادرى جنى رايح حرب مو سفر..

الفيزا اوكى عندى فيزا لندن من سنتين الحمدلله

اهم شى الجو الحلو والتمشى والسوقة والقهاوى وراحة البال..

انا احب اروح بعد الاماكن التاريخية استمتع فيها..

حبايبى اسلم عليكم سلام جثير جثير

ديروا بالكم على الكويت

لا تحلون المجلس وانا مسافر نطرونى

وهالله هالله بالغبار..ترى لونه قدساوى لا تزعلون منه

قولوا الحمدلله الغبار مو خضر جان كلونا العيم

الى يبى صوغه يقلب ويهه ترى انا رايح استانس مو رايح اشرى لكم اغراض وهدايا

بروحكم محد عطانى هدية من ثلاث سنين وانا فاتح مدونتى على الطل

ماعندى الا عتوج اناجرها وتانجرنى

لا وهى بعد كل ست اشهر تكتب مرة

بعدين تحوشها الكابة وتغط ست اشهر ثانية

يعنى الحين اقولكم عتيجة راح تكتب شهر رمضان الياى

مع السلامة

ونشوفكم على خير بشهر سبعة

بيباااى

كظماوى وكويتى ومزيون ومسافر وان شاء الله مستانس

لحد ينضلنى عاد

اعرفكم بعضكم عيونهم وعيونهن حاااااارة

اه منهن